Full klaff på Nutheim sitt målarkurs

Fyrste veka i juli var 12 deltakarar samla til Målarkurset på Nutheim. Kurset vart starta av billedkunstnar Erlend Grøstad i 1960 og var det fyrste i sitt slag. No er det dotter og niese av Erlend Grøstad, Ellen Grøstad Barstad og Kjersti Grøstad, som held kurset.

Landskapsmåleri av vidgjeten utsikt

Etter ein god frukost på Nutheim Gjestgiveri og ein skuletime med fagleg påfyll, har elevane fått fyrste store oppgåve. No skal dei ut i landskapet og finne eit motiv. Dei har alle med seg ein papirlapp med eit hol som dei skal bruke som ei ramme for å sjå utsnitt av landskapet igjennom.

Ein av elevane har funne seg ein flott plass i det grøne. Er det tilfeldig at ho matchar blomane framom seg?

Fyrst skal dei skisse det dei ser igjennom papirlappen. Deretter skal dei lage ei skisse i skisseblokka. Det vanskelege er ikkje å finne eit landskap, men å velje ut eit passeleg motiv. Og så må ein hugse på det gyldane snitt, fargepalett og komposisjon.

Kor ein ser i landskapet rundt det gamle kunstnarhotellet, finn ein nokon som står med staffeli og kosar seg i det fine vêret.

Ein av elevane lurer på om mentoren kan sjå kva for utsnitt av landskapet ho har vald. Mentoren meiner eleven har ein frisk strek og roser for koloritten. Kanskje vil eleven bli litt meir stø i perspektiv og komposisjon utover uka?

Stasleg middag kvar kveld

Det er ein inspirert gjeng som et middag med fire rettar den kvelden. Dei har hatt ein flott dag ute i det vidgjetne landskapet. Kanskje er det Norges mest måla utsikt?

Bordet er dekt og restauranten på Kunstnarhotellet Nutheim skal snart servere fire rettar med lokale råvarer til dei sultne elevane.

Og ein del fagleg påfyll har det blitt også. Både målarteknisk og kulturhistorisk. Jamvel ein tur til Eva Bull Holtes Museum har mentorane fått plass til i programmet. No et elevane lokal mat og nokre unner seg eit glas vin eller to til det flotte måltidet.

Neste morgon startar også med god frukost med heimelaga brød og syltetøy. Til oppvarming før dagens leksjon i målarteknikk, får elevane beskjed om å teikne kroki av ein aktmodell. Fem teikningar på tre minuttar kvar. Ikkje alle er like stø i anatomi, men mentorane fortel at det ikkje er perfeksjon som er idealet. Ein må finne sin eigen “strek” og verdiperspektiv kan også vere ein måte å løyse oppgåva på.

Ein kursdeltakar måler skog.

Dagens måleoppgåve er skog. Altså eit bilete med meir enn eitt tre. Fleire av kursdeltakarane erfarer at skog er mykje vanskelegare enn ein skulle tru. Men øving gjer meister, og mentorane er heile tida i nærleiken til å gje gode tips og råd.

Også i dag får elevane beskjed om å finne motiv med ramme fyrst. Deretter skal dei skisse, før dei kan begynne å dra målinga utover lerretet.

Ikkje alle elevane tør utfordre seg med den vanskelige oppgåva å måle lauv. Kanskje er det lettare å måle bjørkestammer og autovern?

Kvar kveld samlast elevane i restauranten. Her kan dei nyte god mat medan dei ser originalkunst på veggane. Kunst er det også i dei to galleria på Nutheim, Kjellargalleriet og Låvegalleriet.

Erfarne mentorar

Elevane har fått tilbakemeldingar på landskapsmaleriet og skogsmaleriet av dei to mentorane, Kjersti og Ellen. Begge mentorane har kunstutdanning og stort engasjement for å finne dei kunstnariske kvalitetane i alle måleria til elevane - både dei erfarne som har meir teknikk og dei helt ferske som kanskje ikkje enno har funne sin “strek”.

Kjersti Grøstad tenk med seg hobbymålarane på tur ned til Terje Grøstad sin gamle bustad og atelier.

Kjersti Grøstad tek med seg elevane ned til sin barndomsheim kor ho vaks opp med kunstnarfar sin, Terje Grøstad, som var bror av Erlend Grøstad. I dag har elevane fått undervisning i perspektiv, horisontlinje og fokuspunkt. Dagens oppgåve er nemleg å måle bygningar. Og her omkring er det mange bygningar med ulike vinklar og høgder på tilbygg å velgje imellom.

Elevane har vanskeleg for å velgje bygning. Men mange ender opp med å måle eit av dei mange bura som er samla og plassert på tunet. Nokre av elevane på målarkurset har fått sitt eiget bur å bu i medan de er på målarkurset. For alle bura er innreda som hotellrom med eigne bad og kan huse gjester ved kunstnarhotellet.

Kunstnarisk utvikling

Elevane fekk allereie på starten av uka i oppgåve å måle svart bakgrunn på eit lerret. Den siste dagen får elevane svar på kvifor det kan være artig. I oppgåva med stilleben, opplev elevane at motiva deira nærast poppar ut av lerretet når dei målar blomar i krukker og fint oppsette komposisjonar av frukt, glas og flasker.

Siste dagen med oppgåve å måle stilleben på svart lerret har fått ros, kritikk og tips til forbetring av mentorane Ellen Grøstad Barstad og Kjersti Grøstad

Dei tolv elevane har blitt ein fin gjeng igjennom veka. Nokre har blitt vener og har laga planar om å vitje kvarandre seinare i sommar. Andre har kjøpt boka til ein av medelevane og gler seg til å lese.

Alle er litt slitne, men dei har fått kreativt påfyll, interessante historier, fagleg utfordring og gode minner. Kanskje sjåast nokre av elevane igjen på seinare kurs, for her er det mange gjengangarar? Den eldste har vore med 25 gonger.

Neste kurs er i veke 37. Meir informasjon om kurset og korleis en meld deg på finn du her.